ازاي تدخل هندسة حتى لو انت علمي علوم ومن 50% ثانوي عام |وداعا للتنسيق

420

ايوه مش بهزر خالص انا دخلت هندسة عين شمس ب50%
ازاي و هل فيه كده … هعرفك كل حاجة بعد الفاصل
بس استنى كده طلب صغير تدوس لايك للفيديو و اشترك في القناة وفعل زرار الجرس و كده 😅
الاول حابب اعرفكم بنفسي
انا خالد طالب تانية مدني هندسة عين شمس
هرجع بالزمن كده 4 او 5 سنين واحكيلكم الحكاية بسرعة
انا كنت طالب زيكم و كنت علمي رياضة وطبعا كان نفسي ادخل هندسة … من الاخر كنت هموت عليها و كاتب قبل اسمي eng في كل حته في البيت و طاير بحلمي
للاسف حصلتلي ظروف + تقصير من عندي مش هضحك عليكم جبت للاسف 73%
روحت حاولت كتير اوي اني اعيد السنة معرفتش خالص و قالولي ده قانون مادام نجحت خلاص ملكش تحسن مجموع حتى ولو ابن وزير،


مفيش غير اني اعيد تانية و تالته ثانوي تاني وحسين الموضوع هيبقى صعب ورخم جدا و يأست جدا
المهم وانا مروح حد قالي روح أسأل استاذ فلان مش فاكر اسمه الحقيقه بس جزاه الله خيرا
وطبعا كنت هنفض بس قولت ليه لأ طب روح اسأله كده
وبالفعل سألته وكلمته بكل صراحة اني عايز اعيد السنة وحلمي اني ادخل هندسة باي طريقة و حكيت معاه بكل صراحة،
تقبل مني و نصحني اني ادخل معهد سنتين صناعي واطلع منه على هندسة !! ساعتها استغربت جدا و خدت الكلام بنوع من الحيره لحد ما بحثت كتتييير على النت و سألت حد قريبي كان في المعهد ده فعلا و عرفت كل حاجة (تقريبا)،
وهنا هقولك معلومات عن المعهد ده
التعليم الثانوي الي انتوا خلصتوه ده اسمه تعليم متوسط سواء متخرج من ثانوي عام او صناعي او تجاري
وبعد كده يا بتدخل معهد سنتين و ده بقى بيبقى اسمه تعليم فوق متوسط وبيبقى فيه منه اقسام كتير زي فني صناعي و فني تجاري و مساحة و فني صحي ،
وبعد كده التعليم العالي ودي اي كلية او معهد ٤ سنين يديك درجة البكالوريوس او الليصنص
هنتكلم و نركز على التعليم الفوق متوسط
شهادتها مش حلوة نوعا ما غير لو دخلت معهد فني صحي او مساحة مثلا ،
وبالمناسبة بتدخل الفني الصناعي و المساحة من علمي ايا كان رياضة او علوم و الصحي من علمي علوم
بس ليك تنسيق في سنه تانية وده الي عايزينه و بندور حوليه ،
المهم قررت اني ادخل معهد فني صناعي المطرية و اخترت المطرية لانه المعهد الرئيسي و الاهم و كمان الي بيدرسولك مهندسين كبار فعلا هطلع منه بتحب القسم الي انت فيه و فاهم كويس جدا،
انت بتدخل مع طلاب صنايع 3 سنين و قليل من ثانوي عام ،
انت بيبقى متاح ليك كل الأقسام عادي جدا بس الحق سجل اول ما يفتح علشان فيه اقسام بتخلص بسرعة
معظم الي جايين من ثانوي عام بيدخل قسم حاسبات لان معظم دراسته من ثانوي عام على خفيف بس انا دخلت عمارة و هي قسم ممتاز جدا برده بس هتعاني شوية لما تتعود على الرسم،
الحمد لله عديت اول سنة بأقل مجهود ممكن جبت جيد جدا بس متعملش زيي حاول تقفل من اول سنة لان بيبقى فيه تخصص في تاني سنة و دائما فيه تخصص عليه اهتمام أكبر ، يعني انا كنت في عمارة و سنة تانية اتخصصت عمارة برده وفيه ناس اتخصصت ديكور ،
الدراسة في المعهد بتعتمد على أعمال سنة منها العملي و مشاريع و الباقي على امتحان اخر الترم


على فكرة كل سنة على ترمين و دي حاجة ممتازة على فكرة
المشكلة بس أن الترم الاول لتظهر نتيجة تقديرات فقط بس لكل المواد يعني امتياز / جيد جدا /جيد و كده
انا الحمد لله وكل الي ذاكر وتعب شوية هيجيب امتيازات بسهولة،
السنة التانية بيبقى معاك مشروع صغير الترم الاوف عليه درجات كويسه بتكون فريق من أصدقائك بتعملوه مع بعض و درجاته مضمونه
اما الترم التاني بتاخد مشروع تخرج كبير بتعمله لوحدك هتتعب فيه شوية بس كل المهندسين بيساعدوك و هتجيب فيه درجات كويسة ان شاء الله مادام تعبت
و بيبقى عليه درجات كتير ،
غير أن المعهد كله انشطه و شغل عملي و حاجة كده متحسسكش بالملل خالص.
بس تعاله اديك نصايح مهمه جدا جدا جدا….
*اولا انت داخل المعهد ده علشان تدخل هندسة وهتدخل ان شاء الله فمتيأسش و متحسش انك اقل من حد انا كنت بحس دايما بالفشل لما اصاحبي مقضينها في الجامعة وانا في معهد مع مستويات مختلفة شوية عني
*ثانيا ابعد عن البنات لو انت الي بتسمعني شاب
او لو انتي بنت ابعدي عن الشباب
مش نبعد يعني نقاطع بعض وكده لأ
انا اقصد ابعد عن انك تدخل المعهد تقضيها سرمحه و قهاوي و انتوا فاهيمن الباقي قصدي ايه
انا كان المعهد لازق في هندسة المطرية وكنت بروح هناك علشان مشوفش المناظر دي ،وكنت كل لما اشوف الكلية قدامي كان بيديني حافظ اكتر واكتر
*ثالثا صاحب الناس الي عايزة تدخل هندسة وبس
صاحبهم و اسألوا بعض و ساعدوا بعض و ادخلوا مشاريع مع بعض فعلا ده هيفرق معاك جدا وهيديك حافظ كبير جدا ان شاء الله،


*اخيرا حابب اقول المعهد مش صعب خالص و لا محتاج نص مذاكرة الثانوية العامة بس محتاج مجهود في الحضور و الواجبات الي بتنفذها ،
بس مش معنى كده أنه سهل لان للاسف اعرف ناس كانت جايبة 89% في ثانوي عام و دخلت المعهد بكل إهمال ومدخلتش هندسة و العكس صحيح اول الدفعة عندنا كان جي من صنايع 3 سنين ذاكر شوية وركز جامد على حلمه ودخل هندسة بترول و تعدين السويس الي بتدخلها ب 99% من ثانوي عام،
اهم حاجة تفكر و تكرر و تتكل على الله وصلي استخارة و تسأل،
اخيرا بقى علشان طولت جدا انت ممكن لا قدر الله بعد ما تدخل المعهد ومجبتش مجموع هندسة تعمل معادلة هندسة حتى لو جبت في المعهد 50% ويتبقى عبارة عن انجليزي و رياضة و فيزياء كيميا تقريبا و بتنجح بس في المعادلة بتدخل هندسة على طول الي انت عايزها بس تحزييييييير اوعا تدخل المعهد وتفكر في المعادلة
تاني اوعا تدخل المعهد و تفكر في المعادلة
خليك في المضموع ومتضيعش من عمرك و المعهد اسهل كتير من المعادلة ،اخيرا احب اقول لكل واحد فيكم ربنا شايلك الخير كله والله ومتزعلش على حاجة مخترتهاش لان ربنا اخترلك الاحسن و المناسب ليك ،
حاول تتأقلم و تتخذ القرار و تلاقي نفسك فعلا و ساعتها هتحس بالنجاح 😊

1 Comment
  1. RoyalCBD.com says

    Useful information. Lucky me I discovered your site by chance,
    and I’m stunned why this accident did not took place
    in advance! I bookmarked it.

    Also visit my blog post – RoyalCBD.com

Leave A Reply

Your email address will not be published.